plan21

Il plan d’instrucziun 21 descriva tgei che las scolaras ed ils scolars duein saver e saver far alla fin da mintga ciclus. El center stattan pia las cumpetenzas dils roms e las cumpetenzas transversalas e buc ils cuntegns. Quei munta ch’il plan d’instrucziun 21 prescriva buca pli allas persunas d’instrucziun tgei cuntegns ch’ellas han d’instruir exactamein, mobein las finamiras finalas ch’ellas han da contonscher cun lur classas. Tuttina ha la formaziun dalla savida dils roms e la capientscha profunda dalla cultura ina grond’impurtonza. El plan d’instrucziun 21 vegn denton l’entira savida rinforzada e consolidada cun agid da cumpetenzas e buca cun in’enumeraziun da tematicas. Cun agid dallas cumpetenzas vegnan cuntegns culturals cumbinai cun habilitads ed inschigns dils roms sco era cullas cumpetenzas transversalas. Quei munta che la savida e las habilitads, las cumpetenzas dils roms e las cumpetenzas persunalas, metodicas e socialas vegnan colligiadas ina cun l’autra e promovidas el medem mument. Quei ha per consequenza ch’igl entir process d’emprender, naven dall’acquisiziun entochen al sligiar problems, vegn pli impurtonts ed aschia daventan era las strategias d’emprender pli centralas. 

Ellas vegnan schizun adina puspei menziunadas a moda fetg concreta el plan d’instrucziun 21. Ell’instrucziun da romontsch va ei per exempel buca mo per migliurar las cumpetenzas da basa sco tedlar, leger, discuorer e scriver, mobein era per promover las strategias d’emprender. Ils scolaras e las scolaras ston emprender e sviluppar bunas strategias per saver tedlar e capir in text, per leger e capir ina historia, per discuorer e per scriver in bien concept. Las strategias d'emprender giogan denton buca mo tier las cumpetenzas dils roms ina rolla impurtonta, mobein era tier las cumpetenzas transversalas (mira extracts ord il plan d'instrucziun 21).