Loading...
Differents studis demuossan che la vegliadetgna stat en in stretg connex cul svilup dallas strategias d’emprender. Quei munta ch’ils scolars e las scolaras sviluppeschan ed approfundeschan adina dapli lur repertori da strategias d’emprender, naven dalla scola primara, ella scola superiura e suenter en scolas cuntinuontas. L’elavuraziun d’in bien repertori da strategias d’emprender ei denton biaras gadas plitost in process stentus e vegn pil pli buca semplamein iniziaus da sez ni entras la madiraziun.
Igl ei grev da dir cura ch’ils affons sviluppeschan exact las singulas strategias d’emprender. Per l’ina dependa ei dalla sort e cumplexitad dalla strategia. Per l’autra ein las circumstanzias dalla situaziun d’emprender decisivas. Mo tuttina selai igl entir svilup dallas strategias d’emprender parter en treis differents stadis d’emprender.
Egl emprem stadi san ils affons aunc buca far diever a moda spontana dallas strategias d’emprender, perquei che las premissas cognitivas mauncan aunc. Quei munta ch’els ein aunc buca capavels da reproducir ina strategia d’emprender en atgna reschia. Era in bien model respectivamein ina buna demonstraziun gida cheu buca vinavon ils affons. Els san era buca trer a nez ina strategia d’emprender, sch’els vegnan supplicai da far quei. En quella fasa sesanflan denton per regla mo affons fetg giuvens.
El secund stadi san ils affons aunc adina buca far diever a moda spontana dallas strategias d’emprender. Els ein denton habels, suenter in’explicaziun ed in'introducziun detagliada dalla persuna d’instrucziun, da realisar e trer a nez ina strategia d’emprender concreta. Quei ei pusseivel, perquei ch’ils scolars e las scolaras possedan en quei stadi las premissas cognitivas. Cun imitar han els denton aunc adina miserias. Quei munta ch’els dismettan ed emblidan la strategia d’emprender, sche negin pretenda dad els da far diever dad ella. Il motiv ei ch’ils affons ein aunc adina buca propi perschuadi dil nez dallas strategias d’emprender. Els vesan l’utilisaziun dallas strategias d’emprender sco in pensum supplementar e buca sco in levgiament.
El tierz stadi san ils affons lu finalmein far diever a moda autonoma e spontana da singulas strategias d’emprender. Els vesan denton aunc adina buca propi lur avantatgs. Per quella inefficienza dallas strategias d’emprender dat ei duas raschuns. D’ina vart ein las singulas strategias d’emprender aunc buc automatisadas avunda. Da l’autra vart san ils scolars e las scolaras aunc buca propi cura che tgei strategia fa senn. Quei munta ch’ils scolars e las scolaras drovan aunc dabia energia per exequir la strategia e san aschia buca propi profitar dad ella. Plinavon maunca ad els quella energia per quei ch’els havessen d’emprender effectivamein.
Quei ha per consequenza ch’ei sa dar gronds conflicts da motivaziun en connex cun las strategias d’emprender. Las empremas experientschas cun las strategias d’emprender ein numnadamein stentusas e pil pli inefficientas. Detg cuort: all’entschatta ei il sforz gronds ed il success plitost pigns. Quella perioda difficila ston ils scolars e las scolaras all’entschatta surmuntar cun exercitar, exercitar ed aunc inagada exercitar. Quei entir process d’emprender, la zona da bassa motivaziun e la curva dalla prestaziun d’emprender illustrescha la grafica sutvart fetg bein.
Per quei motiv eis ei impurtont ch'ils affons vesan adina il senn en quei ch'els han d'emprender en scola e che las tematicas ein relevantas per els. Sch'ils scolars e las scolaras vesan numnadamein buc il senn en quei ch'els han da far, porta tutta premura negin fretg. Il medem vala per las strategias d'emprender. Ils scolars e las scolaras ein pér promts da remplazzar meins bunas strategias cun meglieras, sch'els ein perschuadi dil nez supplementar dalla nova strategia. Per quei motiv sto la persuna d'instrucziun dar als singuls affons avunda temps per exercitar ed automatisar novas strategias d'emprender.